HMEICHHE TLEIRAWL TE TAN INCENTIVE TRAINING NEIH A NI.

Khawbung the 25th September, 2011: Tunkar Zirtawpni, 23rd Sept khan Khawbung BRC Hall-ah Khawbung ICDS Project bul tumin Tleirawl (Adolescent Girls) kum 11-18 inkar te tan Incentive Training, Pi WC Zorammawii CDPO kaihhruaina hnuaiah buatsaih a ni a.He hun hmang hian Khawbung ICDS Project hnuaia khaw hrang hrang a tangin Tleirawl mi 45 zet an lo kal khawm a ni. He Training-ah hian thupui hlawm then hrang hrang pali zir ho a ni a. Resource Person Pali ten thiam tak leh hneh takin training an pe a ni.

Pi Dr.Lalmuanpuii chuan ‘Adolescent Health’ tih thupui hmangin tleirawlte hriselna lam hawi thu sawiin,’’Mihringte hi kum upa lam kan lo nih hnua kan natna chi hrang hrang 70% vel  hi tleirawl kan nih laia ei leh in kan tihthat tawk loh vang te,zuk leh hmuam leh ruihtheih thil kan tih thin vang te a ni a,tleirawl laia Sex hman hian natna thalo kan kai hma bik a.Nau tihtlak te hi mahni fa tur that kan ni a, ringtu te chuan tih loh tawp tur a ni.” a ti a ni.
Pi Zorinpuii Ralte (MSW) chuan ‘Social Issues Related to Adolescent Girls’tih thupui hmangin thusawina hun a nei a,”Tleirawl kan nih laia midang te nena kan khawsak hona a kan awm dan tur leh kan mawhphurhna te,kan tih leh tih loh tur lam hawi thu sawina hun neiin mi ngaihsan ni tur chuan faina kan ngai pawimawh tur a ni a, tleirawl laia rilru leh taksaa danglamna hrang hrang lo thleng thinah te hian nu leh pa, chhung te leh lehkhabu te rawn thin tur a ni a. Tleirawlte mawhphurhna chu aia upa zah leh Rualbanlo te ngaihsak hi a ni” a ti bawk.
He training-ah hian Pu Dino C.Laldinliana, Link Worker Supervisor MSD&RB Khawbung Block chuan HIV/AIDS chungchanga tleirawlte hriat tur pawimawh tak tak sawina hun a nei a,Link Worker te hna thawh leh thil tum chi hrang hrangte sawiin HIV/AIDS laka kan invent theihna tura atul ang a hma la tur an nih dan leh tanpui theitu an nih dante a sawi a. Pi WC Zorammawii CDPO Khawbung chuan “Aims&Objective of Balika Mandal”tih thupui sawina hun neiin  Chhungkua, kohhran leh khawtlang siamtha tur chuan “Kristaa nun neih hi a pawimawh a,Krista a nun neih chuan tuna nu leh pa ni tawh te harsatna tawh ang tam tak hi pumpelh theih a ni a,nun uluk leh fimkhur chuan lei malsawmna tam tak hi an dawng thin” a ti.He Training hmang tura lo kal zawng zawngte chungah leh a hlawhtlin theihna tura tha leh zung sengtute zawng zawng chungah lawmthu sawina a neih zawh hnuah training hi tihawp a ni.

He tiang ang tleirawl te  thanlenna tur leh nunphung atana zirtirna tha tak mai Training hlawhtling taka buatsaih a ni hi a lawmawmin buatsaihtute an fakawm hle a,Tunlai khawvelah hetiang lam hawia tleirawlte  zirtirna pek hi a tul takzet a, khawtlang nun siamthatna kawnga hmalakna pawimawh tak pawh a ni nghe nghe.

Posted in: Khawbung