Khawbung Branch YMA kaihhruaina in Khawbung-a NGO hrang hrang te leh Kohhran hrang hrang hruaitu te leh Val Upa te nen KC Auditorium ah Chhiatni a Dan kan hman mek chu ennawn a ni a. Siamthat ngai siamthat a nih bakah belh ngai te belh a ni bawk. He hun hi Pu F.Vanlalriana, Fin. Secretary (Br.YMA) kaihhruaina a neih a ni a. A hnuaia mi ang hian Dan hmanlai mek chu siamthat leh siam belh a ni:-
1. Ruang tlaivar pui tur chin: Chawhma Dar 10 hnulama thi te.
2. Tlaivar pui lova phum tur te: Chawhma dar 10 hmalam a thi te.
3. Mitthi vui hun: Lu men ngai ah chuan Vui hunserh Dar 11:00 AM a ni ang. Lu men ngai lovah chuan chhun Dar 12 ah hunserh hman tur a ni ang.
4. Khual khua a thi: Khual khua a thi, ruang lo la thleng tur chu ruang in khua a rawn thlen hunah a vui hun leh thlan laih hun tur ruahman a ni ang.
5. Ruang thlen hma: Khual khua a thi, ruang la thlenglo te chu ruang awm ang em a in sawngbawl loh nise.
6. In nghah chungchang: Mitthi chhungte, khual atanga ruang rawn nan tuma lo kal te chu a tul anga nghah theih an ni ang.
7. Kuang siam leh Kuang a indah: Kuang siam hi tufa te mawhphurhna ah kan ngai a. Tufa neih dan a zirin YMA in bengvar chhuah thin nise. Kuang siam zawh veleh ah in dah thin nise.
8. Khual koh theih chin: Khual koh theih chin leh in tirh dan ah Val Upa dan dinglai hi a la tha tawk kan ti. (Khawbung ram chin Mel 7 chhung, khual ral kai lo). Phone leh W/T hmang tur pawhin hmang tur pawhin Val Upa/YMA/VC te hriatpui loh chuan in tirh loh nise.
9. Vui hunserh: Kohhran tin ten vui hunserh hi ngai pawimawh ila, hei hian hun bik, inkhawmpui leh hun pawimawh bik huam lo se.
10. Ruang awm laia Dawr khar: Ruang ni ah ruang thlak hma chuan dawr hi khar thin nise.
11. Inkhawm laia khawhar in-a zai leh zai loh: Inkhawm lain khawhar inah zai loh hram nise. Inkhawm lai te khuang ri in a tihbuai lohna ah chuan inkhawm ban kim hma pawha lo zai hi pawilo ah kan ngai.
12. Hlamzuih : Thla thum chin kan tih hi ram pum hman dan a ni a. A la tha tawk ah kan ngai.
13. Khawhar in riah : Khawhar in riah reizawng hi tang then leh lenglai awm chuang lovin kar khat nise.
14. Thlan thut chungchang: Thlan thut hi thisen zawmpui te ah chauh thut nise, zai loh theih nise.
15. Thih cham hman chungchang: Thih cham hi awmni khama, thenrual te pun a Thihchamphaphak serh hi tihdan phungah hmanloh nise.
16. Sar thi: Mitthi pangai anga sawngbawl zel nise.
17. Buhfai leh thing khawn: Mitthi pual-a buhfai no 1 leh thing fak 2 kan khawn thin hi la khawn zel nise. Mitthi awmna veng hnai te chuan a hma thei anga khawn thin nise.
18. Mitthi dar vuak: Mitthi dar vuak ah chuan Kohhran hrang hrang te tihdan hi tha kan ti.
19. Ralna bawm chungchang: Ralna bawm dawh hi chhunzawm zel nise kan ti a. Bawm hi mumal taka dawh in tufa te enkawl turah kan ngai.
20. Ruang thlalak pui: Ruang thlalak pui hi senso hautak lo zawnga kalpuihram nise.
21. Thlan nghah ni: Thlan nghah ni hi a hautak lo zawnga kalpui hram hram nise.
22. Khual a kalpui tu te ei siamsak loh: Khual khua mitthi avanga kal zuitu te lo haw inlama ei lo siamsak hi chinloh nise.
23. Chhiat tawh a ei siam: Chhiat tawh avanga ei kan siam thin hi ruang thlak nil eh a tuk thlan nghah ni bak siamloh nise. A hautak lo thei ang bera siam ni bawk se.
24. Ei siam leh thingpui lum chungchang:
(1) Ruang zuitu ei siam: Khual a thi ruang zuitu te ei siamsak hi chhunzawm zel nise. Dal leh sanghatin siamsak nise.
(2) Khual koh te chaw ei siam: Khaw thenawm khual koh te hi chaw ei siamsak leh tawh nise (Senso hi chhiatni fund atanga hman tur a ni). (
(3) Ruang tlaivar zan thingpui: Ruang tlaivar pui zan hian thingpui thlum leh eitur tuihnai siam nise.(Zankhat atan Rs.2000/- aia tamlo nise).
(4) Chhiatni fund sum hmanga thingpui lum reng reng ah hian a thingpuisen vek nise kan ti.
25. Information a chhiat tawh au chungchang: Chhiat tawk(thi) kan awm in a rang thei ang bera au thin nise. Khawchhunga zualko kan intirh thin pawh intir tawh lovin Information hi rin tawh mai nise kan ti.
26. Khawbung PHC-a thi/boral te hi arang lamin Information-ah puan thin nise.
27. Kuang chunga pangpar dah chungchang: MHIP ten an lo ruahman angin kuang thlalakpui laiin MHIP pangpar chauh dah tur a ni ang. NB: Heng kaihhruaina siam te hi mitthi dinhmun te, an thih hun te, kan hun tawng leh khawtlang boruak a zir in hruaitu (YMA, VC, Val Upa, MUP, MHIP, Chhiattawk awmna Kohhran) ten tul leh tha an tih angin an ti danglam in an siamrem thei ang.
