Editorial

CHANCHINBU MAN
Kan ti nek nek a, thla tawp kan lo thleng ta reng mai, vawiin hi kan chanchinbu man khawn hun a lo ni leh ta. Chanchinbu hi Khawbung Branch YMA in khawtlang ina kan mamawh zia hria in sum tam tak seng in tlawmngaihna rilru nen a buatsaih a ni a. Chanchinbu enkawltu te pawh tlawmngai a enkawl tura ruat an ni thin. Chanchinbu man chungchang thu ah thlakhat atan ~5 hi a ni rei ve ta hle mai. Typewriter hunlai atanga ~5 tawh kha laser printer kan hman thlengin a la pangai a, tunlai khawvel ah kuhva pack khat pawh ~10 anih tawh laia hetiang a Branch YMA in hma a la thei hi fakawm tak a ni. Amaherawhchu thil man to zel ah kan mamawh engkim a lo to ta a. Paper thlengin a to chi vek hman a lo ngai ta a. Chuvang chuan pawisa sen a lo hautak ta hle a. Chawi belh rau rau ah pawh a lo hautak chhoh tan tak avang leh thil man to zel chhut in nakum lamah chuan ~10 tal hi a awm ve tawh niin a lang a. Mipui te pawhin na kan tih lemloh a rinawm. Engpawh nise vawiin ah khawngaihin a man hi  min lo pe leh phawt mai teh u’n.

Read more »

Editorial

KAN HMASAWN LEH NA TUR
Kan khawtlang in kawng hrang hrang in hma kan sawn kan ti a, chutih rual chuan thahnem ngaihna a nasat avangin hmasawn na tur kan la ngah hle mai. Abik takin ar khung chungchang ah hian hmasawn kan la ngai viau niin a lang. Thenkhat thu awih taka khung thap kan awm laiin la khung duhlo, mi huanthlai la tichhe thin te an la awm tlat mai a. Heng la khunglo te hian han khung sela chuan huan thlai eng ilo fahran han ei tur te pawh kan lo nei tlang hlawm thei anga. A va lawmawm dawn em. Ui neitu thenkhat te pawh kan bang bik lo. Amaherawhchu nikum lam ai chuan nasa takin hma kan sawn tawhin khawlai a ui leh ar tla pawh hmuh tur an vang ta pharh mai. Khawtlang hruaitute thu la zawm velo tlemte avangin kan la buai a, an ni hian kumin chhung ngei hian khung hman tumin tan han la leh sela. Thuawih takin han khung tlang dial ila chuan kan khawtlang hi tun aiin a nuam ngei ang le. Khawtlang hmangaihtu inih chuan Ar khung ve rawh le.

Read more »

Editorial

A VA MAK EM!!!
Khawbung hi khaw thang tak kan ni in a len pawh kan lian tawh hle a. Changkan na pawhin nasa takin min tuam in khaw changkang pawl tak pawh kan ni a. Chutih rual erawh chuan mi thenkhat, changkanna leh finna in a tuam ve miahlo vang nge ni anga, chhungkaw inzirtirna tlakchham vang nge ni anga, mawl vang te, at vang te, sual hrim hrim vang te ni ang tih ngaihtuah tham takin naupang mai bakah nu leh pa ni tawh te pawhin mi huan thlai leh thildang lo lak ruk ching kan la awm hi a va mak em!!! Hmanni lawkah Mahatma Gandhi NREGA banner te sava veh thin ten an lo perh chhia tih thawm te a lo awm ta rawl nen. A bul tumtu nu leh pa te hian kan fa te ah thu tha inzirtir nasat kan va la mamawh em. Kan changkan viau tawh lai hian changkan lohna leh mawlna hi thing tak tak hian khawtlang mipui te hian lanchhuah tir tawhlo teh ang u. Abik takin hetiang tih ching mi tlemte te khan khawtlang hmel tibaltu in ni tih hria in a rang lama sim tum teh u khai. A thing emai  ti tawp mai ang.

Read more »

Editorial

EI TUR A KAL KAN NI EM?
Ram leh khawtlang in hma a sawn ang zel in kan khatlang ah pawh hmasawnna leh finna a luang lut mek zel a. Thil tha tak tak te kan khawtlang tan ngaihtuah chhuah a niin ngaihtuah chhuah zel pawh a la ni ngei ang.
Khawhar in kal chungchang ah abik takin tlaivar zan bik ah hian tlaivar te tan ei siam a ni thin a. Thalai rual, tlawmngaihna avanga tlaivar te tan chuan pum ruak lutuk tur a veng in a nuam thei hle thin. Chutih rual chuan tlaivar ve chiah lemlo, ei zawha haw ta mai thin kan tam hle. Sawhchiar hi a tlangpui in zan dar 12 leh dar 1 inkar ah sem a ni tlangpui a. Hemi hunlai hi chuan awm kan tam thin hle a, plate engemaw zat semral a ni thin. Amaherawhchu ei zawh atang erawh chuan khawhar ina awm hi kan tlem pharh thin. Thalai ten he thilah hian insiamthat kan mamawh niin a lang. Tunhma khan tlaivar zanah ei siamlovin thalai tam tak an tlaivar thin a, tunah erawh chuan ei leh in thleng chiaha awm peih kan tam ta. Thalai te hian ei leh in tur chauhin em ni khawhar in kan kal thin?

Read more »

Editorial

FAINA HAPTA
Faina hapta kan lo hmang chho leh dawn ta reng mai. Hemi pual hian fai inelna te pawh neih a ni dawn bawk a, thil tha tak ani pawhin a lang. Chutih rual chuan kan khawtlang fai kan duh a, kan ti tak tak dawn anih chuan faina hapta lo thlen huna fai intihsiak chauh lo deuh hi programme siam theih nise a duhawm khawp mai. Kawngpui dung a bawlhhlawh bawm dah te kan hman tangkai viau tawh lai hian hman tangkai nachang la hrelo kan la awm nual mai. Zawi zawi chuan hma kan sawn ve hret hret zel e. Tun aia hmasawn thei kan ni in hmasawn zel pawh kan tum tur a ni ang. Kan khawtlang a lo fai chuan kan lo hrisel anga, hrisel chu damrei na a lo ni bawk nen.
Khawtlang faina kawngah hian kan khawtlang hruaitute chauh kuta dah lova, mimal tin ten tan kan lak a pawimawh hle ani. Fai hi Pathian an teuh na ber a ni si a.

Read more »

Editorial

A VA NUAM EM
Branch hruaitu ten tlawmngai tura min ruat angin kuminah Entu Editorial Board ten chaklo tak chungin chanchinbu kan han enkawl ve a. Harsatna leh buaina tam tak te kan tawk ve thin a, amaherawh chu kan hruaitu fel tak tak ten kan harsatna te min hriatpui in min ngaihtuah em em thin a. Kan va lawm tak em.
Tin, mimal anga min fuih tu te, kan diklohna min hrilh a fuihna tha chitinreng min fah thin tu te engemawzat in awm bawk. Kan lawm em em a, nangmahni vang chauhin kan enkawl ve thei tawk tawk tih lo hria ula. Thurawn min pe zel turin khawtlang mipui te kan ngen cheu a ni e.

Read more »

EDITORIAL

KAN CHANGKANG EM?
Khawvel a changkang a, thiamna a pung zel bawk. Mithiam te chuan mihring thluak hnathawh angmaia hna thawk thei chip an siam chhuak der tawh mai. He chip hian mihring thluak hnathawh ang deuh chiah hian a thil tawn leh a thil hmuh te a chhinchhiah in chumi ang chuan amahin a ti thiam ve zel tawh dawn a ni.
Hetiang khawpa thiamna punna ram, kan khawvel ah hian keini Mizoram kilkhawr ber thleng hian changkanna chuan min man tawh a. TV leh mobile phone te pawh in tinah hmuh tur a awm ta. Tunah chuan rual pawlna angah kan ngai der tawh mai.
Hetiang taka kan changkan tawh lai hian an tellova kan awm theih loh thing leh mau leh nungchate humhalh kawngah chuan kan ram hian changkanna kawng kan la zawh nasa lo hle mai. YMA kumpuan Khawtlang nun siamthat nena ngaihtuah pawhin hemi kawng ah hian kan khawtlang hian tun aia nasa a hma kan sawn a pawimawh hle mai.

Read more »

ENTU EDITORIAL

KAN MAWI EM

Kan khua ah mikhual an rawn kal teuh mai, min hmuh danah hian Khawbung khua hi kan mawi angem tih hi zawhna pawimawh tak, keimahni khua tan chuan chhan mai har tak tur, mikhuate tan erawh chuan chhan nuam tak tur a ni.
Mikhual kan lo lawm danah leh kan phungthluk danah te chuan sawi selna tur kan awm lo mai thei, mahse, mikhual an nih chhunga kan awm dan hian khaw lian ka nihna hi a keng ngei tur a ni. Mikhual tlangval an nih avanga sual kan chak tlatna leh tihbuai kan chak tlatna thinlung te, hmuhsit deuh leh deuh hram kan chakna rilrute hi chu a pui a pang, a lian a te, harfim leh harfim lote pawh hian kan paih a hun ta hle mai. Hall a awm khawm kan zo dawn lo a nih a, mi kan tibuai chak dawn a nih chuan mahni inthiar fihlim na chang kan hriat a hun a tak zet zet a ni.
Khawbung khawtlangin Hall chhunga zial kan han zu miah lo mai erawh kha chu hmuh  anuam hle mai, chhawmnun zel i tum mawlh teh ang.
Hall chhung pun khawmna hmunah a bengchheng leh mite tana hrehawm siamtu kan ni ve lo leh ar mit tet khuan a khuang kan tam ve lote kha a lawmawmin chhawmnun zel i tum ang u.

Read more »

ENTU EDITORIAL

I FA TE AN HIM EM?
Khawvel a changkang chho zel a, thiamna a sang a, finna a pung zel a. Chutih rual chuan sualna pawh a pung in a sang chho ve zel bawk. Mizoram ah pawh sualna a pung in tunhma a kan hriat ngai loh thil thalo tam tak a lo chhuak ve ta.
Hmanni lawk ah Champhai District-a hmeichhe pakhat chu hrehawm taka amah awmpui tu ten an chhawr avangin chhanchhuah a ni a. Tin, India ram hmun hrang hrang ah Mizo hmeichhia nawhchizawrh luih tir te chhanchhuah an ni bawk. Thil hrechiang deuh te sawi dan phei chuan mahni duhthu ngei a hetiang lama sumdawng hi phai lamah khuan mizo thalai engemaw zat an awm an ti ani. A rapthlak hle mai.
He dinhmun hi keini khawtlang pawh hian tawk ve thei reng kan ni a. Kan chhungkua ah chhungkaw tin ten inzirtirna tha kan mamawh a. Thil  engkim anih tur ang anih tawh hnu ah hi chuan lungngaih bak hmabak kan nei thin lo. Chuvang chuan hetiang huna kan fihlim theih nan chhungkaw tin te inzirtir i uar ang u.

Read more »

ENTU EDITORIAL

KHAWTLANG NUN SIAMTHAT

YMA chuan Kumpuan thupui atan Khawtlang Nun Siamthat tih kan hmang mek a. Hemi pual hian naupang lamah programme hman a lo ni tawh a. Nula leh tlangval te nena programme hi hmang leh turin ruahmanna eng eng emaw neih mek a ni bawk a.
Kan khawtlang nun han en hian siamthat ngai tam tak a awm in a hriat a. Khawhar ina tlaivar kan tlem thin lutuk te, thlan laihna ah thlan khur a lut kan tlem lutuk thin te hian insiamthat kan mamawh zia a ti lang chiang hle awm e.
YMA member i nih a, member fee i pe anih chuan khawhar ina kal te, thlan laih te hi phut ngai hauh lova i tihtur chiangsa a ni.
Tin, tlawmngaihna chungchang ah YMA member kan nih vang chauha tlawmngai tur kan ni lova. Mizo hnam nun a tlawmngaihna hi bet tlat zawk ani tih kan hriat a pawimawh.
Nu leh pa te pawhin insiamthat kan ngai nasa hle. Kan fa te khawhar in kal turin kan ti ngai em? Tlaivar turin kan ti ngai em? Kan chhungkua ah YMA member tha ni thei turin kan in zirtir ngai em?
YMA an chak lo ti a iak iak thin te hian keimahni kan in ti mualpho mai mai ani tih kan hriat a hun tawh. YMA a mualpho chuan, a mawhphurtu chu nu leh pa te kan ni. Kan fa te thil tha hrilh a kaihhruai kan tum loh chuan YMA hi pawl chak a ni thei ngai lovang.

Read more »

Editorial

KAN VA LAWM EM

Pathian hruai na in kumin kum chanve kan lo hmang zo dawn ta reng mai. ENTU hian kumin kan hun hman chhoh danah khawtlang mipui te chungah lawmthu sawi kan va ba nasa em.
Khawbung Branch YMA in kan tlin lohna leh fellohna hai der in ENTU enkawl turin min han ruat ve a. Kan huphurh ru khawp hlawm a.
Amaherawhchu kan huphurh ang em em in sawiselna kan dawng ngai hauh lo, chutih rual chuan in mi fuih na leh thurawn tha tak tak min pekna te erawh chu kan hre reng a. Kan theih tawp a tha a tih pawh kan tum ve a. Mahse mihring thil tisual thei kan nih miau avangin kan Chanchinbu a thu chhuah te erawh duh aiin a phuailuai deuh thin.
Hemi kawngah hian in mi hriatthiam hram hram kan ngai a. Chutih rual chuan keini lam pawh theihtawp chhuah in kan tang ve zel e.
A tawp ber ah chuan tlawmngai a chanchinbu min laksak tu zawng zawng te chungah kan lawm em em a. Chumai bakah Internet lam atanga khawvel hmun dang atanga nghakhlel taka lo thlir thin tu te zawng zawng chungah leh khawtlang mipui leh Khawbung Branch YMA hruaitu te, kan tlinlohna leh fellohna min hliahkhuh sak thin tu te leh thurawn min petu zawng zawng te chungah kan lawm em em a.
Thu ziak mi te erawh chu thu ziak lamah theihtawp a min tanpui turin kan ngen nghal a che u. 

Read more »

YMA DAY THUCHAH

-Pu. H.Lalniliana President, Khawbung Branch YMA.

YMA day vawi 76-na kan lo thleng leh dawn ta reng mai, khawtlang mipui te he ni ‘YMA Day’ hi hlim tak leh nuam taka hmang theuh turin duhsakna sang ber Khawbung Branch YMA in kan hlan rual in kan hmalakna kawng hrang hrang, Hlakungpui Silver Jubilee kan hmanna ah te, Lui dung nungcha humhalh kawngah te, kawngpui siam hnatlang kan neih ah te leh kawng hrang hranga kan chetvel na ah khawtlang hruaitu leh mipui ten theihtawp min chhuahpui na avangin lawmthu kan sawi tak meuh meuh a ni.

Lawmthu kan sawi rual in tuna kan khawtlang nihphungah erawh chuan duhthu a la sam lovin hmabak pen leh na tur a la tam hle mai. Sawisen ni dawn lo mahse kan tan lak thar lehna tura thinlunga langsar zual deuh deuh hlawm lian deuhin in tarchhuak dawn teh ang.

Chhiatni a in ralna pek loh kan zak miahlo te, khawhar in kal rual kal lova khawlai len leh mahni ina tawm kan zaklo te hi sim a insiamthat theih nise. Nu leh pa ten kan fa te anmahni, chhungkua leh khawtlang tana zirna hlut zia leh pawimawh zia hriain tun ai hian rual elna rilru neihpui theih nise. Ruihhlo zuartu leh ruih ching te hian khawtlang ti nuamlo tu leh mahni inbum an nih hria in han sim thei se. Chhungkaw tin hian ramdang mi leh hnamdang mi te chhawr ngailo tur hian mahni intodelh theih nise. Tlawmngaihna leh rinawmna hi kan khawtlang leh ram tinuam tu anih hria in mimal tin hian kan nun ah lanchhuahtir zual nise. Ramngaw leh nungcha (Khawmual leh lui dung a mite) te hi kan nunna hnar leh nun tihlim tu an nih hriain mitin hian mahni tanghma chauh thlir lova humhalh theih nise.

Chhungkaw tin te hian hei lo chu khawdang kan neilo ani tih hria in kan khawtlang hlim tak leh nuam taka kan nun ho na tur hi uar zawk a inzirtir in, khawtlang nun siam tur hian kan chhungkua theuh hian mawh kan phur ani tih hi he YMA Day vawi 76-na kan hman niah tal hian chuan hrechhuak thei theuh ila. Kan khawtlang nuam taka kan nunho na tura siamthat ngai lai theuh te han insiamtha ila, kan khawtlang hi a va nuam dawn em tiin Khawbung Branch YMA chuan kan auchhuahpui a ni e.

YMA vul zel rawh se.

Read more »

ZIRNA

ENTU Editorial..
Hma kan sawn zel a, kawla nichhuak chhiara ram hna thawk thin kan nih thin pawh hre tawh lo leh hlo thlawh dan pawh thiam tawh lo khawpin kan changkang ta, kan changkang a, khawpuia an tih thin angin ram kilkhawr berah pawh mobile hmangin mi kan bia a, internet thlengin kan hmang ve thei ta reng mai, a lawmawm; changkannain kan kawtkai a rawn thleng ve hi kan lawm tur a ni. Mahse, chu changkanna chu kan hmang thiamlo a nih chuan kan chhiatpui dawn. I duh emaw duh lo emaw he changkanna hian a man dawn tho tho che, chuvang chuan nangmah inveng ang che.

Read more »