KEIMAHNI

Vawiin hi kan chanchinbu man khawn hun a lo ni leh ta a. Kan chanchinbu min laksak tu zawng zawng te khan khawngaih a kan Agent te hnenah khan ENTU man min lo pe leh hram turin kan ngen tak meuh meuh che u a ni e. Internet lama entu te chuan advertisement ah hian in lo click ve mai a ni ang chu.....:D
Internet lama ENTU chhiar duh tan www.khawbungyma.blogspot.com ah en/ chhiar theih a ni e.

ENTU EDITORIAL BOARD

Read more »

LAWMTHU SAWINA

Ka pu Thangthuama, Khawbung ngai  ngawih ngawih chunga khawvel chhuahsan ta te, ka pa te unau Khawbung-a piang deuh vek an nih avang te in Khawbung khua ka nihna hi ka chhuang em em a. Khawbung hi kan ngai ngawih ngawih thin.
Hetiang anih avangin Pathian malsawmna te dawng in Champhai District Boxing Association te buatsaih Boxing Tournament(Pro fight) ah vanneih thlak taka ka champion ve chungchang ah hetiang em em a khawtlangin min lawmpuina, sum leh pai tam tak mimal leh pawl hminga min petu zawng zawng te (in zavai a hming tihlan sen a ni lo) chungah lawmthu ka sawi mawlh mawlh a.
Pathian zar a dam te a ka khelh theih zel chuan kan khaw mipui min tawiawmna hi ka hmachhuan ber tur leh ka in nghahna ber in ni e.
Ka lawm e

In duhsak
Zothlamuana
Khawbung

Read more »

HARSATNA KARA LAWMTHU

Ka fapa Vanlalchhuanmawia, thinhnun na leh pum nat avanga chawlhkar thum lai damdawiin a ka awmpuina ah kan Doctor leh a thawhpui te min khawngaihna leh an mi enkawlna ah, theihtawp min chhuah sak avangin ka lawm hle a. Kan Pastor leh Kohhran ho min tawngtai puina te Pathian in a hre reng a. Chhungkhat laina te leh Pathian mi hriat ho ten khawngaih thilpek rawn hlan in a khawngaih malsawmna kan hnena rawn hlantu te zawng zawng a let tam takin Lalpan malsawm zel che u rawh se.
Kan YMA ten YMA taka min tanpuina ah thinlung leh tihtak zet in, khawtlang mipui hriat ah ka lawmthu ka han puang a ni e.

In khawngaih, in zar a awm
K.Thangchhunga
Dinthar Veng

Read more »

Editorial

KAN VA LAWM EM

Pathian hruai na in kumin kum chanve kan lo hmang zo dawn ta reng mai. ENTU hian kumin kan hun hman chhoh danah khawtlang mipui te chungah lawmthu sawi kan va ba nasa em.
Khawbung Branch YMA in kan tlin lohna leh fellohna hai der in ENTU enkawl turin min han ruat ve a. Kan huphurh ru khawp hlawm a.
Amaherawhchu kan huphurh ang em em in sawiselna kan dawng ngai hauh lo, chutih rual chuan in mi fuih na leh thurawn tha tak tak min pekna te erawh chu kan hre reng a. Kan theih tawp a tha a tih pawh kan tum ve a. Mahse mihring thil tisual thei kan nih miau avangin kan Chanchinbu a thu chhuah te erawh duh aiin a phuailuai deuh thin.
Hemi kawngah hian in mi hriatthiam hram hram kan ngai a. Chutih rual chuan keini lam pawh theihtawp chhuah in kan tang ve zel e.
A tawp ber ah chuan tlawmngai a chanchinbu min laksak tu zawng zawng te chungah kan lawm em em a. Chumai bakah Internet lam atanga khawvel hmun dang atanga nghakhlel taka lo thlir thin tu te zawng zawng chungah leh khawtlang mipui leh Khawbung Branch YMA hruaitu te, kan tlinlohna leh fellohna min hliahkhuh sak thin tu te leh thurawn min petu zawng zawng te chungah kan lawm em em a.
Thu ziak mi te erawh chu thu ziak lamah theihtawp a min tanpui turin kan ngen nghal a che u. 

Read more »

BRANCH/SECTION

Nimin ni 15/6/2011(Inrinni) khan Khawbung leh Dungtlang inkar kawng kam a thing rawng hnawih leh Kuang tur thing phek nawh fai hnatlang neih a ni a. Member engemaw zat an thawkchhuak a. Member thawkchhuak te zawng zawng chungah Branch YMA hruaitu te chuan lawmthu an sawi tak meuh meuh a ni.

Nimin khan YMA chhang ten Mizo Hlakungpui Mual sam fai hnatlang an nei a.  Hnatlang a thawk chhuak an thahnem hle.

Read more »

NEWS

Mizo Hlakungpui Mual a Archive cum Library sakna tur atana Hlakungpui ram Contour Mapping ti tur te chu Naktuk Dt.27/6/2011 hian Khawbung an rawn thleng anga. An ni hian an survey zawh ah Architech ten a sak dan tur duang leh in chumi hnu ah Building sak hna hi tan a ni dawn a ni.

Read more »

HRIATTIRNA

Mizo Hlakungpui Mual chhungah khuai a lawi thin a. Hei hi humhalh tlat a ni in tumahin lak phal a ni lo. Lo la lui in awm a, man chhuah in nih chuan in chungah action lak a ni ang. Tin, thing awm te pawh lak khap tlat a ni bawk a. Mipui ten thuawih taka la lo hram turin kan in ngen nghal bawk. Tin, sava veh khap tlat a ni bawk a. Veh lui man chhuah in nih chuan action lak a ni ang.

Read more »

MIZO HLAKUNGPUI MUAL COMMITTEE DIN THAR A NI

Khawbung the 26th June 2011: Mizo Hlakungpui Mual Silver Jubilee chu ropui taka hman zawh a lo ni ta a. Silver Jubilee Committee pawh Khawbung Branch YMA chuan a ti tawp ta a. Amaherawh chu hmabak hmachhawp tam tak a la awm avangin Khawbung Branch YMA chuan Hlakungpui Committee din leh tha a ti a. Tichuan Office Bearer tur te Branch YMA ececutive committee chuan din in chung OB te leh Branch YMA OB te chuan Committee member tur an ruat leh ta a.
          Chung committee member thar te nen chuan committee hmasa ber chu Dt.24/6/2011(Zirtawp) zan khan KC Auditorium ah neih a ni a. Hetah hian Mizo Hlakungpui Mual  enkawl chhoh zel nana mamawh hrang hrang te leh a tihchangtlun nana mamawh hrang hrang te sawiho a ni a. Hmachhawp thahnem fe siam a ni bawk.
          Mizo Hlakungpui Mual hi Khawbung Branch YMA hmalakna in Kum 1986 khan a thawh khatna leh a bul tanna hun hman a ni a. Branch YMA enkawlna hnuai ah tun thleng hian a la kal chho ta zel a ni. Chutih rual chuan Khawbung Branch YMA ta bik a ni lova, Khawbung khawtlang mipui te ta, Mizo hnahthlak tawh phawt te ta ani tih kan hriat a tha awm e.
           Mizo Hlakungpui Mual hian khawvel ram hrang hrang atangin tlawhtu a nei ve deuh reng tawh a. A hmun a rawn kal remchanglo te pawhin website www.hlakungpui.com hmangin Mizo Hlakungpui Mual ah hian an rawn lenglut thin a. Khawvel hriat a kan khawtlang min pho chhuak tu leh min chawimawi tu a ni a. Khawtlang mipui ten a neitu kan nihna hria in tun aia nasa a a enkawl lamah pawh tan kan lak a hna kan thawh a pawimawh hle mai.

Read more »

KUMPUAN PROGRAMME

Khawbung Branch YMA chuan YMA kumpuan ‘Khawtlang Nun Siamthat’ bawhzuina Programme kum 14 atanga kum 19 inkar ten Khawbung Community Hall ah hman tur a ni dawn a. Hemi huamchhung naupang te chu kim taka kal vek tur a ni ang.
A hun : Dt.26/6/11(Sunday chawhnu inkhawm ban)
Chairman : Pu R.Vantluanga, Vice Pre. KB Br.YMA
Thusawi : VC, MHIP, Val Upa
              : Pu HB.Lalnuntluanga
              : Dr.Vanlalrengpuia Chinzah

Read more »

HRIATTIRNA

Dt.25/6/2011(Inrinni) hian Khawbung leh Dungtlang inkar kawng dung a thing rawng hnawih leh Kuang thingphek nawhfai hnatlang neih tur a ni a. YMA member te hnatlang turin kan insawm a. Executive committee chin phei chu kim taka kal tura ngen kan ni.

Read more »

BRANCH/SECTION

Kan khawtlang ah tlaivar ngai a chhiat tawk kan awm in tlaivar tuk zing ah Branch YMA executive te kaihruaina in tinna hun hman thin a ni tawh dawn a. Tlaivar te tumah in haw san lovin a rual a haw thin a ni tawh ang.

Chhiat tawk an awm in kuang khuhna lak leh senghawi chungchang ah a bik in section ten tan la thar ila. Tufa te tih atana dah mai lovin bengvar i chhuah tlang thin ang u.

Champhai District Boxing Association te buatsaih Boxing competition ah Khawbung tlangval Zothlamuana chuan Final a lut a. Branch YMA chuan lawmpuina thilpek pek tha a hria in pek a ni dawn. Tin, final an khelh hunah a remchan dan anga va tawiawm tum a ni bawk.

Sava no chawm hun a lo ni chho leh ta a. Khawtlang mipui te hemi hun chhunga sava veh insum hram hram turin kan in ngen mawlh mawlh e.

Read more »

NEWS

YMA Day-a Section intihsiak na result:-
SOLFA:- 1)K section, 2) M-section, 3) A section, 4) Y-section.
LENGKHAWM :- 1) K-section, 2) Y-section, 3) M section, 4) A-section.
Apumpui result:
1. K Section, 2. M Section, 3. Y Section, 4. A Section.
YMA CHHANG :- 1.M Section, 2. A Section, 3. K & Y Section.

Mizo Hlakungpui Mual Committee Office Bearer atan Branch YMA chuan heng mi te hi a ruat :-
Chairman : Dr.Vanlalrengpuia Chinzah
Vice Chairman: Pu Lalniliana Hnamte President KB Br.YMA, Pu T.Vanlalhruaia VCP, Pu PC.Rozika
Secretary : Pu H.Lalnunmawia
Joint Secretary: Pu T.Laltlanfela, Pu Samuel Malsawmtluanga
Treasurer: Pu R.Lalchhuanawma
Fin. Secretary: Pu Lalchhanhima Hnamte
Heng OB te leh Branch YMA Office Bearer te Dt.21/6/2011 zan ah Pu  Lalniliana Hnamte te inah inhmukhawm in Committee member tur te an ruat leh ang.

Rajia Sabha MP Pu Lalhmingliana’n Khawbung Community Hall tihlen a Indoor Stadium sak min tiam na chu remchang hmasa ber ah bawhzui tum a ni.

Khawvel hmun dang a awm velo, Muaumit chu Branch YMA chuan humhalh tha a ti a. He mau hi khual khua atanga lo kal ten mak an ti thei hle a. Tin, mau chi hrang zir chiang tu te ngaihven pawh a hlawh tan hle. Hetiang thil hlu kan neih te hi khawtlang mipui ten humhalh hi kan mawhphurhna a ni.

Read more »

YMA DAY ROPUI TAKA HMAN A NI

Khawbung the 19th June 2011:YMA day vawi 76-na chu Mizoram hmun hrang hrang ah ropui taka hman a ni a. Khawbung-ah pawh Khawbung Community Hall-ah ropui taka hun hman a ni. Programme hi chawhma leh chawhnu hun ah then a ni a. Zan lam programme siam erawh chu cancelled a ni ta a. Chhun lamah programme hi tluang taka neih zawh a ni.
          Chawhma lam hun ah Kumpuan thupui sawina hun te, Zaipawl intihsiak te, section report te, Life member certificate sem leh Khawbung tihmingtha tu te chawimawina hun hman a ni a. Zaithiam zai leh thusawi tha tak tak ngaihthlak a ni bawk.
          Chawhnu lam hunah pawh programme hlimawm tak hman a ni a. Lengkhawm zai intihsiakna neih a ni a. Tin, debate ropui ‘Kan khawtlang nun hi a la tha tawk’ tih thupui hmanga neih a ni a. Mover lamin kan khawtlang nun la that tawk zia hneh taka an rawn sawi chuan kan khawtlang kan lo la that zia a ti lang chiang hle a. Chutih rual chuan Opposition lamin mover te hneh a hneh tak maia kan khawtlang nun chhiat zia an rawn sawi leh chuan nasa takin kan khawtlang nun siamthat a ngaih zia a rawn tarlang a. Tichuan, thutlukna ah kan khawtlang nun hi siamthat a lo ngai nasa tawh a ni e tih a ni ta a ni.
          Tlai lamah YMA Day hmangtu ten ruai ropui kil ho nghal a ni bawk.
          Dt.17/6/2011(Zirtawp) zan khan Branch YMA executive committee chuan YMA Day thlirletna a nei a. Ku 2011 YMA Day kan hmang tha hle a, a hlawk thlak hle a ni. Chutih rual chuan Function hman dawn a YMA member te kan kal tlai lutuk erawh insiamthat kan ngai hle. Tin, YMA Day kan hman leh hunah chuan Social Works lam neih tum tawh a ni.
          YMA Day thlirletna atangin Light & Sound Committee din tha tih a ni a. Tin, khawhar in a section tin member kal tam lawmman buatsaih tha tih a in committee hmasa berah hemi chungchang hi rel a ni ang.
         YMA Day ah hian tanpui ngai tanpui na tur mahni neih remchan ang thawhkhawm a ni a. Heng te hi tanpui ngai te hnenah sem a ni dawn a. Thawhlawm tlingkhawm a thahnem hle.

Read more »

KEIMAHNI

ENTU Editorial Board a kan Cir.Manager, Pu.R.Lalthankima chu a hna avanga hmun dang a a awm tak avangin Board Member tur dil belh a ni a. Branch YMA chuan Pu Lalthlamuana S/o Pu C.Hmingkunga, Tlang veng chu min rawn dah sak a. Kan lawm hle. Hetih rual hian kan Joint Editor te pahnih in thil pawimawh avangin min zin san a. Kan khua a har hle.

Read more »

THI

Tukin zing dar 8:15 khan Pu Dengkunga, Khuangpu Denga tia hriat lar chu Cancer natna avangin Aizawl ah a boral. Pu Dengkunga hi Khawbung khaw khuangpu thiam hmingthang a ni a. Khawbung leh a chhehvel ah chuan Khuangpu Denga ti a hriat lar a ni. Mizo Lengkhawm hla te hi hriatloh a nei tlem hle a. Khuang a vuak lai hian Hlabu a en ngai lo, maimitchhing chungin hla a hril pah thin.

Read more »

NEWS

Khawbung Branch YMA executive committee vawi 8-na chu Dt.9/6/2011(Zirtawp) zan khan KC Auditorium ah neih a ni a. YMA Day program ennawn na neih anih bakah thu pawimawh tak tak te ngaihtuah a ni a. YMA Day kan lawm na turah chanvo inruat belh/thar a ni bawk.

Mizo Hlakungpui Mual Silver Jubilee committee chu Silver Jubilee kan hman zawh tak avangin Khawbung Branch YMA chuan a ti tawp ta a. Chutih rual chuan hmalakna zawm na tur a tam avangin Hlakungpui Committee hi din leh a ni dawn a. A in rel chhoh zel na tur ruangam lo siam turin Commission member 6 awmna din a ni. Nizan khan heng commission member te hi a vawi khatna atan an inhmukhawm nghal bawk

Read more »

YMA DAY THUCHAH

-Pu. H.Lalniliana President, Khawbung Branch YMA.

YMA day vawi 76-na kan lo thleng leh dawn ta reng mai, khawtlang mipui te he ni ‘YMA Day’ hi hlim tak leh nuam taka hmang theuh turin duhsakna sang ber Khawbung Branch YMA in kan hlan rual in kan hmalakna kawng hrang hrang, Hlakungpui Silver Jubilee kan hmanna ah te, Lui dung nungcha humhalh kawngah te, kawngpui siam hnatlang kan neih ah te leh kawng hrang hranga kan chetvel na ah khawtlang hruaitu leh mipui ten theihtawp min chhuahpui na avangin lawmthu kan sawi tak meuh meuh a ni.

Lawmthu kan sawi rual in tuna kan khawtlang nihphungah erawh chuan duhthu a la sam lovin hmabak pen leh na tur a la tam hle mai. Sawisen ni dawn lo mahse kan tan lak thar lehna tura thinlunga langsar zual deuh deuh hlawm lian deuhin in tarchhuak dawn teh ang.

Chhiatni a in ralna pek loh kan zak miahlo te, khawhar in kal rual kal lova khawlai len leh mahni ina tawm kan zaklo te hi sim a insiamthat theih nise. Nu leh pa ten kan fa te anmahni, chhungkua leh khawtlang tana zirna hlut zia leh pawimawh zia hriain tun ai hian rual elna rilru neihpui theih nise. Ruihhlo zuartu leh ruih ching te hian khawtlang ti nuamlo tu leh mahni inbum an nih hria in han sim thei se. Chhungkaw tin hian ramdang mi leh hnamdang mi te chhawr ngailo tur hian mahni intodelh theih nise. Tlawmngaihna leh rinawmna hi kan khawtlang leh ram tinuam tu anih hria in mimal tin hian kan nun ah lanchhuahtir zual nise. Ramngaw leh nungcha (Khawmual leh lui dung a mite) te hi kan nunna hnar leh nun tihlim tu an nih hriain mitin hian mahni tanghma chauh thlir lova humhalh theih nise.

Chhungkaw tin te hian hei lo chu khawdang kan neilo ani tih hria in kan khawtlang hlim tak leh nuam taka kan nun ho na tur hi uar zawk a inzirtir in, khawtlang nun siam tur hian kan chhungkua theuh hian mawh kan phur ani tih hi he YMA Day vawi 76-na kan hman niah tal hian chuan hrechhuak thei theuh ila. Kan khawtlang nuam taka kan nunho na tura siamthat ngai lai theuh te han insiamtha ila, kan khawtlang hi a va nuam dawn em tiin Khawbung Branch YMA chuan kan auchhuahpui a ni e.

YMA vul zel rawh se.

Read more »

BRANCH/SECTION

Kawbung leh Dungtlang in kar kawng kam a thing rawng hnawih hnatlang chu hun rem chang hmasa ber ah neih tum a ni a,YMA member te hna tlang turin lo in ring lawk ang u.

Nimin Dt.10/6/2011 khan Y-Section te chuan Terrace lai a inhlawh hnatlang an nei a. Member thahnem tak an thawkchhuak thei. Member thawkchhuak te chungah leh phal taka an fa te thawhchhuah tir tu section nu leh pa te chungah lawmthu an sawi tak meuh meuh a ni. Tin, Pu F.Zanawla ten hnatlanga kal te kalna tur motor a rawn thawh a. An chungah Y-Section chuan lawmthu an sawi mawlh mawlh a ni.

Tun lai hian section hrang hrang ten YMA day a in tih siak na tur hla an zir ngawrh hle. YMA member te thahnem ngai taka intihsiakna hla zir turin kan insawm e.

Read more »

KHSS LAWMTHU

Pu B.Lalramliana chuan KHSS cheina atan Balu Tin 8 a pe a, Pi Ringaiin Far kung a khawi nun sa chu phal takin kawt zawl laia phun tur a pe bawk. Tin, Khawbung PHC in damdawi chi hrang hrang an pe a, Forest department in thing tiak engemawzat an pe pawk. Thilpek petu te chungah KHSS Principal leh Staff te an lawm hle.

Read more »

ZIRNA

ENTU Editorial..
Hma kan sawn zel a, kawla nichhuak chhiara ram hna thawk thin kan nih thin pawh hre tawh lo leh hlo thlawh dan pawh thiam tawh lo khawpin kan changkang ta, kan changkang a, khawpuia an tih thin angin ram kilkhawr berah pawh mobile hmangin mi kan bia a, internet thlengin kan hmang ve thei ta reng mai, a lawmawm; changkannain kan kawtkai a rawn thleng ve hi kan lawm tur a ni. Mahse, chu changkanna chu kan hmang thiamlo a nih chuan kan chhiatpui dawn. I duh emaw duh lo emaw he changkanna hian a man dawn tho tho che, chuvang chuan nangmah inveng ang che.

Read more »

BRANCH/SECTION

 Dt.11.06.2011 (Inrini) hian Y Section ten hnatlang neih tur a ni a, Pathian Veng Waiting Shed ah innghahkhawm tur a ni a, chaw lian tawk taka fun tur a ni. member te thahnem ngai taka hnatlang theuh turin kan inngenin kan insawm tak meuh  meuh a ni.Tin, nu leh pa te pawhin kan fa te hnatlang a thawhchhuah tir hram hram turin kan in ngen e.
Y-Section Property incharge Tv.Zorinsanga chu zirna avanga hmun dang a min awmsan tak avangin a aiah Tv.Lalrosanga ruat a ni a. Y-Section bungraw hawh tur ten a hnen lamah hian lam thin tawh tur a ni e.
 Dt.6.5.’11(Thawhtan) zan inkhawm ban atangin YMA day intihsiakna tur hla zir tan tur a ni a. Section chhunga YMA member te thahnem ngai taka kal turin kan inngen nghal bawk e.

Read more »

NEWS

Khawbung leh Dungtlang inkar kawngdung thinga rawng hnawihna tur  ~ 2,000/- Green Mizoram leh Environment & Forest hnen atangin kan dawng a, hun remchang hmasa berah rawng hnawih tur hian hnatlang koh a ni dawn a, memberte hnatlang thei turin lo inkau theih ang u.

Pu Lalhmingliana Saiawi, Rajia Sabha MP in a Champhai Sub Hqtrs. te tana a pek Oxigen bur thahnem tak chu Group hrang hrang ah sem darh a ni a. Tuipuiral Group YMA ta chu kan Branch YMA President Pu H.Lalniliana hnenah a awm a, a mamawh tan engtik lai pawha hawh theih reng a ni e.

Read more »

TUIPUIRAL GROUP YMA TEN KHAWBUNG TO CHAMPHAI ROAD SIAMTHA A HNATLANG NEIH A NI

Dated Khawbung the 5th June, 2011: Tuipuiral GroupYMA Conference-in a lo rel tawh angin Khawbung to Champhai Road chhe lutuk repair hnatlang runpui chu Dt 3-4.6.2011 khan neih a ni a. He hnatlang ngaipawimawh a lokal zawng zawngte chungah Tuipuiral Group YMA chuan lawmthu a sawi tak meuh meuh a ni.

He hnatlangpui neih hi mipui ten kan ngaipawimawhin NGO hrang hrang aiawhte pawh an lokal tha hle a, champhai lam atangin Sub-Hqrs YMA hruaitute pawh an rawn tel thei bawk a ni. Tuipuiral Group huam chhunga Branch hrang hrangte kan inlungrual zia alang chiangin kan thawh hona that zia alang chiang hle mai. Hetiang zela kan inlungrual a nih phawt chuan kawngpui tha kan la nei ngei ang. Khawbung khua atanga hnatlanga kal zawng zawngte hnenah Khawbung Branch YMA chuan lawmthu a sawi tak meuh meuh a ni.
Hnatlang kaldan tlangpui hetiang hi a ni. Dt 3.6.2011 ah Khawbung, Zawlsei, Samthang, Khankawn, Vaphai, Chawngtui ‘E’, Dungtlang, Leithum, Vanzau, Zawngtetui, Sesih, Lianpui, Khuangleng, Vangchhia, Sazep leh Khuangthing khuate atangin member 458 thawh chhuah a ni a, Dt 4.6.2011 ah Khawbung , Zawlsei, Samthang, Vaphai, Chawngtui ‘E’, Dungtlang, Leithum, Vanzau, Bungzung, Khuangleng, Lianpui leh Leisenzo atangin member 563 thawhchhuah leh a ni a, he hnatlang hi DDK, CCN Champhai leh Tuipuiral a Cable Operator tam zawkin an cover bakah Vanglaini chanchinbu leh website leh Zonet website ah tarlan a ni bawk. Tin, Mizo website khawvel hmun hrang hrang atanga tlawhtu ngah ber Misual.com ah pawh tarlan chiai chuai a ni bawk. He Work Camp hi Sorkar chona leh tihmualpho tumna nilovin, an tha tichak tura ruahhman a nih thu Group YMA President Pu H.Lalniliana chuan a sawi. He kawngpui hi kan vei tlang a, kum 1993 khan metalled tan niin, a repaired-na lamah harsatna kan neih avangin kum 2004 khan work camp hi neih a lo ni tawh a, sorkar mek ten min hlamchhiah deuh thin avangin tuna ADB sum hmanga siamthat a nih tur thu kan hriat hnuah pawh hmalakna a awm mai thin loh avangin Sorkar tha tichak turin Group YMA chuan tha leh sum tam tak sengin hetiang hian ruahmanna a lo siam ta a ni. Kan khawtlang maswina tura Motor leh sum leh pai thawh tu zawng zawngte chung ah Branch YMA chuan lawmthu a sawi mawlh mawlh ani.

Read more »

Tuipuiral Group YMA hnatlang

Khawbung leh Champhai inkar kawng chhe lutuk siamthat hnatlang chu vawiin atang hian Tuipuiral Group YMA te chuan an nei tan dawn ta.
Khawbung leh Champhai inkar kawng chhe lutuk hi sawrkar ah vawitam tak siam tha tura nawr a ni tawh a. Amaherawhchu tun thlenga ngaihsak leh cheithat a hlawh loh avangin Tuipuiral Group YMA bultum in Group huamchhung a khaw hrang hrang ten chei that hnatlang hi an nei dawn ta a ni.

Read more »

Chibai ule

A hmasa in he blog tlawhtu te chibai ule. Khawvel changkanna kal zel ah Khawbung Branch YMA hminga news leh eng eng emaw han inthawn darh nana website siam hi ka rilru ah a awm reng thin a. Keima website www.samtea.in lamah te kan dah ve bawk thin a. Amaherawh chu duh anga space ka neih loh avang in hetiang a a hranpa a siam hi ka duh ta zawk a.
Tin, he blog ka siam hi Branch hruaitu ten siam tura min tih vanga siam pawh ka ni lemlo a, mimal thahnemngaihna avang leh hmun hrang hranga Khawbung khawchhuak awm tena min ngenna avanga siam mai ka ni tih ka sawi duh bawk a ni.

Read more »